ໜ່ວຍພັກວິຊາການ ທີ່ຂື້ນກັບຄະນະພັກຮາກຖານ ພະແນກສຶກສາທິການ ແລະ ກິລາ ແຂວງ ( ສກຂ) ອັດຕະປື ໄດ້ໄຂກອງປະຊຸມ ຕີລາຄາຄືນຜົນການຈັດຕັ້ງປະຕິບັດການນໍາພາ-ຊີ້ນໍາການເຊື່ອມຊື່ມເນື້ອໃນມະຕິກອງປະຊຸມໃຫຍ່ຂອງຕົນ ແລະ ມະຕິກອງປະຊຸມໃຫຍ່ຄັ້ງທີ VI ຂອງຄະນະພັກຮາກຖານຢ່າງກວ້າງຂວາງ ແລະ ທົ່ວເຖິງ ໃນໄລຍະ 1 ປີ 2024 ຜ່ານມາ; ກອງປະຊຸມດັ່ງກ່າວ ໄດ້ໄຂຂື້ນໃນຕອນເຊົ້າຂອງວັນທີ 03 ມັງກອນ 2025 ນີ້ ທີ່ຫ້ອງປະຊຸມ ສູນໄອຊີທີ ພະແນກສຶກສາທິການ ແລະ ກິລາ ແຂວງ ໂດຍພາຍໃຕ້ການເປັນປະທານ ຂອງ ສະຫາຍກໍລະກັນ ສົມພັກດີ ຄະນະພັກຮາກຖານ, ເລຂາໜ່ວຍພັກ, ຮອງຫົວໜ້າພະແນກສຶກສາທິການ ແລະ ກິລາ ແຂວງ, ມີ ສະຫາຍໃນຄະນະໜ່ວຍພັກ, ຄະນະຈຸພັກ, ສະຫາຍສະມາຊິກພັກ ພາຍໃນໜ່ວຍ, ແລະ ແຂກທີ່ຖືກເຊີນເຂົ້າຮ່ວມ.
ໃນກອງປະຊຸມ ສະຫາຍ ເພັດທະນູຄໍາ ເທບຄໍາພູນວົງ ຮອງເລຂາໜ່ວຍພັກ, ຫົວໜ້າຂະແໜງ ສະຖີຕິ-ແຜນການ ໄດ້ສະຫລຸບຕີລາຄາຜົນການຈັດຕັ້ງປະຕິບັດການນໍາພາ-ຊີ້ນໍາວຽກງານຮອບດ້ານໃນ 1 ປີຜ່ານມາ, ເຊີ່ງໄດ້ຍົກໃຫ້ເຫັນເຖີງຜົນສໍາເລັດ, ຂໍ້ຄົງຄ້າງ, ສາເຫດ ແລະ ບົດຮຽນທີ່ຖອດຖອນໄດ້ວ່າ: ໜ່ວຍພັກວິຊາການມີພາລະບົດບາດ, ໜ້າທີ່ ແລະ ຄວາມຮັບຜິດຊອບຂັ້ນມະຫາພາກໃນການຄຸ້ມຄອງ, ຊີ້ນໍາຜັນຂະຫຍາຍໃນ 4 ຂະແໜງການ ປະກອບມີ ຂະແໜງການສຶກສາກ່ອນໄວຮຽນ; ຂະແໜງສາມັນສຶກສາ; ຂະແໜງ ສະຖິຕິ,ແຜນການ ແລະພົວພັນຕ່າງປະເທດ; ຂະແໜງພັດທະນາຄູ ແລະ 1 ໂຮງຮຽນ ມສ ສົງວັດຫຼວງ, ຖືເປັນໃຈກາງໃນການພັດທະນາຊັບພະຍາກອນມະນຸດຂອງແຂວງ, ໜ່ວຍພັກວິຊາການປະກອບມີ 2 ຈຸພັກທີ່ຂຶ້ນກັບ. ສະມາຊິກພັກທັງໜົດ 33 ສະຫາຍ; ຍິງ 10 ສະຫາຍ, ມີຄະນະໜ່ວຍພັກ 3 ສະຫາຍ; ຍິງ 1 ສະຫາຍ.
ໃນ 1 ປີຜ່ານມາ ຄະນະໜ່ວຍພັກ, ສະມາຊິກພັກໄດ້ຮ່ຳຮຽນ, ເຊື່ອມຊືມແນວທາງ, ແຜນນະໂຍບາຍ, ມະຕິ, ຄຳສັ່ງ, ກົດລະບຽບຂອງພັກ, ກົດໝາຍ ແລະ ລະບຽບການຕ່າງໆຂອງລັດ ໄດ້ 13 ຄັ້ງ, ມີ 15 ເອກະສານ ນໍາມາເຊື່ອມຊືມ ມີສະມາຊິກພັກເຂົ້າຮ່ວມຈໍານວນ 380 ເທື່ອຄົນ, ຍິງ 120 ເທື່ອຄົນ.
